பிரெட் கார்ன் சாட்

 தேவையான பொருட்கள்: 
வேக வைத்து உதிர்த்த மக்காச் சோளம் - ஒரு கப், பிரெட் துண்டுகள் - 6, 
பச்சை மிளகாய் விழுது - ஒரு டீஸ்பூன், 
சீரகத்தூள், மிளகுத்தூள் - தலா அரை டீஸ்பூன், கெட்டித்தயிர் - அரை கப், 
சாட் மசாலாதூள் - ஒரு டீஸ்பூன், 
ஓமப்பொடி - அரை கப், 
நறுக்கிய மல்லித்தழை - ஒரு டேபிள்ஸ்பூன், 
உப்பு, எண்ணெய் - தேவைக்கேற்ப. 
செய்முறை: 
பிரெட் துண்டுகளை ஓரம் நீக்கி, சிறிய சதுரத் துண்டுகளாக வெட்டி, சூடான எண்ணெயில் போட்டு, பொன்னிறமாக பொரித்தெடுக்கவும். தயிரில் சீரகத்தூள், மிளகுத்தூள், பச்சை மிளகாய் விழுது, உப்பு சேர்த்து, தனியே கலக்கி வைக்கவும். இப்போது, வேகவைத்த மக்காச்சோளத்தை ஒரு பாத்திரத்தில் கொட்டி, அத்துடன் பொரித்த பிரெட் துண்டுகள், உப்பு, சாட் மசாலாதூள் மற்றும் தயிர் கலவையையும் ஊற்றி, நன்கு கலந்து விடவும். இதன் மேலே ஓமப்பொடி, நறுக்கிய கொத்தமல்லியை தூவி விட்டுக் கொடுத்தால் சுவையோ சுவைதான். பிரெட் கார்ன் சாட்: இதனுடன் வறுத்த நிலக்கடலை, துண்டாக நறுக்கிய தக்காளி.. இவற்றை சேர்த்துக் கொடுத்தால் இன்னும் கலர்ஃபுல்லாகவும் சிறிது புளிப்புச் சுவையுடனும் அருமையாக இருக்கும்.

வெஜிடபிள் கச்சோரி

தேவையான பொருட்கள்:
 கடலைப்பருப்பு - ஒரு கப், 
உளுத்தம்பருப்பு - கால் கப், 
துவரம்பருப்பு - அரை கப், 
அரிசி மாவு - ஒன்றரை கப், 
மல்லித்தழை-புதினா-இஞ்சி (பொடியாக அரிந்தது) - கால் கப், 
பச்சை மிளகாய் - 5, 
கேரட் துருவல் - கால் கப், 
கோஸ் துருவியது - கால் கப், 
பெரிய வெங்காயம் பொடியாக அரிந்தது - கால் கப், உப்பு - தேவைக்கேற்ப, 
தேங்காய்த் துருவல் - கால் கப், 
எண்ணெய் - ஒன்றரை கப். 
செய்முறை: 
மூன்று பருப்புகளையும் ஒரு மணி நேரம் ஊறவைக்கவும். பின்னர், ஊறவைத்த பருப்பு, தேங்காய்த் துருவல், பச்சை மிளகாய், உப்பு எல்லாவற்றையும் நன்றாக அரைக்கவும். பின்னர், அரைத்த விழுதுடன் மல்லித்தழை, புதினா, துருவிய கேரட், கோஸ், வெங்காயம், அரிசிமாவு எல்லாவற்றையும் கலந்துகொள்ளவும். எண்ணெயைக் காயவைத்து, ஒரு ஏந்தலான கரண்டியால் மாவை எடுத்து, எண்ணெயில் விட்டு, ஒவ்வொரு கச்சோரியாக பொரித்தெடுக்கவும். வெஜிடபிள் கச்சோரி: இதில், அரிசிமாவுக்கு பதிலாக ரவை சேர்த்துச் செய்தால், சுவை இன்னும் கூடுதலாக இருக்கும். பண்டிகைகளில் வழக்கமாக செய்கிற வடைக்கு பதில் இதைச் செய்யலாம். 

தினைப் பாயசம்

தேவையானவை:
பாசிப்பருப்பு- 50 கிராம், 
தினை- 100 கிராம், 
நெய்- 2 தேக்கரண்டி 
முந்திரி, திராட்சை- 25 கிராம், 
வெல்லம்- 150 கிராம், 
பால்-200 மில்லி,
 தேங்காய் துருவல்-கால் மூடி.
செய்முறை: 
பாசிப்பருப்பை லேசாக வறுத்துக் கொள்ளவும். தினையை அரை மணி நேரம் தண்ணீரில் ஊறவைத்து, இரண்டையும் ஒன்றாகச் சேர்த்து, 1 பங்குக்கு 5 பங்கு தண்ணீர் ஊற்றி வேக வைத்துக் கொள்ள வேண்டும். நெய்யில் முந்திரி மற்றும் திராட்சையை வறுத்து கொள்ள வேண்டும். வெல்லத்தை ஒரு டம்ளர் தண்ணீர் கலந்து கொதிக்க வைத்து வடிகட்டி, வேக வைத்த கஞ்சியில் ஊற்றவேண்டும். இறுதியாக, பால், தேங்காய் துருவல் மற்றும் வறுத்த முந்திரி, திராட்சை ஆகியவற்றை இட்டுக் கிளறி லேசாகக் கொதிக்கவிட்டால், பாயசம் தயார்.

கலாகண்ட்

 தேவையானவை: 
கன்டென்ஸ்டு மில்க் (கடைகளில் கிடைக்கும்) - 1 கப், 
பனீர் - கால் கிலோ, 
பால் - அரை கப், 
கார்ன்ஃபிளார் - 1 டேபிள் ஸ்பூன், 
பால் பவுடர் - 2 டேபிள் ஸ்பூன், 
சீவிய பிஸ்தா - 2 டீஸ்பூன், 
ஏலக்காய்த்தூள் - ஒரு சிட்டிகை.
செய்முறை: 
பனீரை நன்கு துருவிக் கொள்ளுங்கள். துருவிய பனீருடன் பால், கன்டென்ஸ்டு மில்க், பால் பவுடர், கார்ன்ஃபிளார் சேர்த்து, அடுப்பில் வைத்து கிளறுங்கள். நன்கு திரண்டு வரும்வரையில் கிளறி, தட்டில் கொட்டி, சமப்படுத்துங்கள். அதன்மீது சீவிய பிஸ்தா, ஏலக்காய்த்தூள் தூவி, வில்லைகளாக வெட்டிப் பரிமாறுங்கள்.

மில்க் கேக்

 தேவையானவை: 
பால் - ஒரு லிட்டர், 
சர்க்கரை - அரை கப்,
 நெய் - அரை கப், 
வினிகர் - 2 டீஸ்பூன். 
செய்முறை: 
முதலில், பாலில் பாதியளவு எடுத்து அடுப்பில் வைத்துக் காய்ச்சுங்கள். பால் கொதிக்கும்போது, அதில் வினிகரைச் சேருங்கள். உடனே பால் திரிந்துவிடும். திரிந்த பாலை (சாதாரண வடிகட்டியில்) வடிகட்டுங்கள். பனீர் ரெடி! மீதியுள்ள பாலை ஒரு கனமான பாத்திரத்தில் மிதமான தீயில் காய்ச்சுங்கள். காயும் பாலில் பனீரைச் சேருங்கள். இது பாதியாகச் சுண்டியதும் சர்க்கரையைப் போட்டு, சிறிது சிறிதாக நெய்யையும் சேர்த்து, விடாமல் நன்கு கிளறுங்கள். பால் நன்கு சேர்ந்து கெட்டியாகி, நெய் பிரிந்து வரும்வரை கிளறவேண்டும். பிறகு, ஒரு ஸ்டெயின்லெஸ் ஸ்டீல் தட்டில் கொட்டிச் சமப்படுத்தி, மற்றொரு தட்டால் நன்கு மூடி, சற்றுச் சாய்வாக வையுங்கள். அதிகப்படியான நெய் வடிந்துவிடும். இரண்டிலிருந்து மூன்று மணி நேரம்வரை ஆறவிடுங்கள். பின்னர் அதை துண்டுகள் போடுங்கள். விருப்பப்பட்டால் சீவி, வறுத்த பாதாமை அதன்மீது தூவி அலங்கரிக்கலாம். குறிப்பு: ஸ்டெயின்லெஸ் ஸ்டீல் தட்டில் வைத்தால்தான் பால் சூட்டில் தட்டும் சூடாகி, கேக்கின் அடிப்புறம் சிவந்தும், மேலே பொன்னிறத்திலும், டபுள் கலரில் பார்க்க சூப்பராக இருக்கும்... சாப்பிடவும்தான்

பனீர் பாயசம்

தேவையானவை:
பால் - 1 லிட்டர், 
பனீர் - 200 கிராம், 
சர்க்கரை - முக்கால் கப், 
ஏலக்காய்த்தூள் - கால் டீஸ்பூன்.

செய்முறை: 
பாலை ஒரு கனமான பாத்திரத்தில் ஊற்றி, அடுப்பில் வைத்து, பாதியளவு ஆகும்வரை கொதிக்கவிடுங்கள். அடிக்கடி கிளற வேண்டாம். மேலே படியும் ஏடுகளை பாத்திரத்திலேயே ஓரிடத்தில் ஒதுக்கிவிட்டு, கொதிக்க விடுங்கள். பின், அடுப்பை அணைத்துவிடுங்கள். பனீரைச் சிறு துண்டுகளாக நறுக்கிவைத்துக்கொள்ளுங்கள். குக்கரில் சர்க்கரையைப் போட்டு, ஒன்றரை கப் தண்ணீர் சேர்த்து, சர்க்கரை கரையும்வரை கொதிக்க விடுங்கள். பின்னர், அதில் பனீர் துண்டுகளைப் போட்டு மூடி, மூன்று விசில் வந்தவுடன் இறக்குங்கள். வெயிட்டை மெதுவாகத் தூக்கி, பிரஷரை வெளியேற்றிவிட்டு, சர்க்கரைப் பாகுடன் கூடிய பனீரை, ஏடு படிந்த பாலில் சேருங்கள். இந்தக் கலவையை ஐந்து நிமிடம் கொதிக்கவிட்டு, ஏலக்காய்த்தூள் சேர்த்து இறக்குங்கள். குறிப்பு: ஒரு அடுப்பில் பால் கொதித்துக் கொண்டிருக்க, இன்னொரு அடுப்பில் குக்கரை வைத்து, பனீர், பாகு கலவை தயாரித்தால், வேலை சுலபமாக முடியும்! 

கார்ன் - சீஸ் கச்சோரி

தேவையானவை: மைதா - ஒரு கப், ஸ்வீட் கார்ன் முத்துக்கள் - ஒரு கப், சீஸ் - 100 கிராம், இஞ்சி - பூண்டு விழுது - ஒரு டீஸ்பூன், எலுமிச்சம் பழம் - அரை மூடி, கரம் மசாலாத்தூள் - ஒரு டீஸ்பூன், எண்ணெய், உப்பு - தேவையான அளவு.

செய்முறை: மைதாவுடன் உப்பு, சிறிதளவு எண்ணெய், தேவையான நீர் விட்டு நன்றாக அடித்துப் பிசைந்து, ஊறவிடவும். ஸ்வீட் கார்ன் முத்துக்களை கொரகொரப்பாக அரைக்கவும். வாணலியில் சிறிதளவு எண்ணெய் விட்டு... இஞ்சி - பூண்டு விழுது, கரம் மசாலாத்தூள், அரைத்த  கார்ன் சேர்த்து வதக்கவும். உப்பு, எலுமிச்சை சாறு கலந்து இறக்கி ஆறவிடவும். சீஸை துருவி இதனுடன் சேர்க்கவும்.

மைதாவை சிறு பூரிகளாக திரட்டி, சோள கலவையை வைத்து மூடி, அதிக அழுத்தம் தராமல் தட்டி, சூடான எண்ணெயில் போட்டு பொரித்தெடுக்கவும்.

  ஸ்வீட் கார்னுக்கு பதில், ஊற வைத்து, வேக வைத்த கொண்டைக்கடலையை வைத்தும் தயாரிக்கலாம்.

ராகி வற்றல்

  தேவையானவை:
ராகி மாவு - 2 கப்,
கல் உப்பு - தேவை யான அளவு,
பச்சைமிளகாய் விழுது - சிறிதளவு,
சீரகம் - ஒரு டீஸ்பூன்.
செய்முறை: 
தண்ணீரை நன்றாக கொதிக்க வைத்து, உப்பு, பச்சைமிளகாய் விழுது, சீரகம் சேர்க்கவும். இந்த தண்ணீரை ராகி மாவில் கொட்டி இடியாப்ப மாவு பதத்துக்கு கிளறி, ஓமப்பொடி அச்சில் போட்டு சிறு முறுக்குகளாக பிழியவும். வெயிலில் நன்கு உலர்த்தி, டப்பாவில் பத்திரப்படுத்தவும். தேவையானபோது எண்ணெயில் பொரித்து சாப்பிடலாம்.

ராகி சேவை

தேவையானவை:
உதிர்த்த ராகி இடியாப்பம் - 2 கப்,
நறுக்கிய இஞ்சி, பச்சைமிளகாய் - 2 டீஸ்பூன்,
எலுமிச்சை சாறு - அரை கரண்டி,
கறிவேப்பிலை - சிறிதளவு,
எண்ணெய் - தேவையான அளவு.
தாளிக்க: 
கடுகு,
உளுத்தம்பருப்பு,
பொட்டுக்கடலை - தலா ஒரு டீஸ்பூன்.
செய்முறை: 
 கடாயில் எண்ணெய் ஊற்றி, தாளிக்கும் பொருட்களை போட்டு தாளிக்கவும். இஞ்சி, பச்சைமிளகாய், எலுமிச்சை சாறு, உப்பு, மஞ்சள்தூள் சேர்த்து, உதிர்த்த இடியாப்பத்தை போட்டுக் கிளறவும். கறிவேப்பிலை தூவி பரிமாறவும்.

ராகி இடியாப்பம்

 தேவையானவை: 
ராகி மாவு - 2 கப்,
 நல்லெண்ணெய் - 2 டீஸ்பூன்,
தண்ணீர் - தேவையான அளவு.
 செய்முறை: 
ராகி மாவை இட்லி தட்டில் துணி போட்டு வேக வைக்கவும். மாவில் தண்ணீர் தெளிக்க வேண்டாம். வெந்த மாவை ஆற வைக்கவும். தண்ணீரை கொதிக்க வைத்து 2 டீஸ்பூன் எண்ணெய் ஊற்றி, வெந்த ராகி மாவில் கொட்டி இடியாப்ப மாவு பதத்தில் கிளறவும். சூடாக இருக்கும்போதே இடியாப்பங்களாக பிழியவும். ஒன்றின் மேல் ஒன்று பிழியாமல் பரவலாக பிழிந்தால் கொழகொழப்பு இருக்காது. வெல்லம் சேர்ந்த தேங்காய்ப் பாலுடன் சாப்பிட சுவையாக இருக்கும். ராகி மாவுடன் அரிசி இடியாப்ப மாவை சம அளவு கலந்தும் செய்யலாம்.

ராகி புட்டு

 தேவையானவை: 
வறுத்த ராகி மாவு - ஒரு கப்,
 அச்சு வெல்லம் - அரை கப்,
துருவிய தேங்காய் - கால் கப்,
ஏலக்காய்த்தூள் - சிறிதளவு.
 செய்முறை: 
உப்பு கலந்த தண்ணீரை மாவில் சிறிது சிறிதாக தெளித்து புட்டுக்கு பிசைந்து கொள்ளவும். பதினைந்து நிமிடம் கழித்து மிக்ஸியில் போட்டு சுற்றவும் (அப்போதுதான் கட்டி இருக்காது). இந்த மாவை இட்லி தட்டில் துணி போட்டு பத்து நிமிடம் வேக வைக்கவும். வெந்த மாவில் துருவிய வெல்லம் அல்லது வெல்லப்பாகு (தேன் பதத்தில்), துருவிய தேங்காய், ஏலக்காய்த்தூள் கலந்து பரிமாறவும். வெல்லத்தைப் பாகாக செய்து சேர்த்தால் புட்டு தொண்டையை அடைக்காது.

ராகி முருங்கை அடை

 தேவையானவை:
 ராகி மாவு - 2 கப்,
முருங்கை கீரை - அரை கப்,
 பச்சரிசி மாவு - கால் கப்,
 நறுக்கிய சின்ன வெங்காயம் - கால் கப்,
உப்பு - தேவையான அளவு.
 தாளிக்க -
 கடுகு,
உளுத்தம்பருப்பு,
கடலைப்பருப்பு - தலா ஒரு டீஸ்பூன்,
காய்ந்த மிளகாய் - 2.
 செய்முறை: 
கடாயில் எண்ணெய் ஊற்றி, காய்ந்ததும் தாளிக்கும் பொருட்களைப் போட்டு தாளித்து, வெங்காயம், முருங்கை இலை சேர்த்து வதக்கவும். பத்து நிமிடம் வதங்கியதும், ராகி மாவு, அரிசி மாவில் கொட்டி இளஞ்சூடான தண்ணீரை ஊற்றிப் பிசைந்து, தோசைக் கல்லில் கனமான அடைகளாக தட்டவும்.

சோயா சங்ஸ் பிரெட் புலாவ்

தேவையானவை: சோயா சங்ஸ் - 50 கிராம், பிரெட் துண்டுகள் - 8, பெரிய வெங்காயம் - 3, பச்சை மிளகாய் - 4, இஞ்சி - பூண்டு விழுது - 2 டீஸ்பூன், கரம் மசாலாத்தூள் - ஒரு டீஸ்பூன், பச்சைப் பட்டாணி - 100 கிராம், கேரட் - ஒன்று, தக்காளி - 2, பொடியாக நறுக்கிய புதினா -  சிறிதளவு, தேங்காய் - அரை மூடி, நெய் - ஒரு டேபிள்ஸ்பூன், பொடியாக நறுக்கிய மல்லித்தழை - சிறிதளவு, நெய்யில் வறுத்த முந்திரி, திராட்சை - தலா 6, எண்ணெய், உப்பு  - தேவையான அளவு.

செய்முறை: பிரெட் துண்டுகளை மிக்ஸியில் போட்டு உதிர்த்துக் கொள்ளவும். வெங்காயம், பச்சை மிளகாயை நீள நீளமாக மெல்லியதாக நறுக்கவும். பச்சைப் பட்டாணியை வேக வைக்கவும் கேரட்டை துருவவும். தக்காளியை பொடியாக நறுக்கவும். தேங்காயை துருவிக் கொள்ளவும். சோயா சங்ஸை கொதி நீரில் போட்டு, 2 நிமிடத்துக்குப் பிறகு நீரை வடித்து, குளிர்ந்த நீரில் 2 முறை அலசி, ஒட்டப்பிழிந்து மிக்ஸியில் போட்டு ஒரு சுற்று சுற்றி உதிர்த்து வைக்கவும்.

வாணலியில் எண்ணெய் விட்டு வெங்காயம் சேர்த்து வதக்கவும். பிறகு, இஞ்சி - பூண்டு விழுது, பச்சை மிளகாய், பச்சைப் பட்டாணி, சோயா சங்ஸ் ஆகியவற்றை ஒன்றன் பின் ஒன்றாகப் போட்டு நன்கு வதக்கவும். (அடுப்பை 'சிம்’மில் வைக்கவும்). இதனுடன் பொடியாக நறுக்கிய தக்காளி, கேரட் துருவல், புதினா, கொத்தமல்லி உப்பு சேர்த்து வதக்கவும். பிறகு, கரம் மசாலாத்தூள், உதிர்த்த பிரெட் துருவல் சேர்த்து நன்றாக கிளறவும். எல்லாம் ஒன்றாக சேர்ந்த பின் நெய்யில், வறுத்த முந்திரி திராட்சை, தேங்காய் துருவல், நெய்  சேர்த்து நன்கு கிளறி இறக்கவும்.

சுடச் சுட சாப்பிட்டால் சுவை இரட்டிப்பாகும். சிறுவர், பெரியவர் என அனைவரும் விரும்பி சாப்பிடும் புலாவ் இது!

ராகி வெஜ் அடை

 தேவையானவை:
  ராகி மாவு - ஒரு கப்,
 மாவாக்கிய கோதுமை ரவை (அ) கோதுமை மாவு - ஒரு கப்,
 பச்சரிசி மாவு (விருப்பப்பட்டால்) - கால் கப்,
 காய்கறி கலவை - ஒரு கப் (துருவிய கேரட், வெங்காயம், கோஸ், முள்ளங்கி), சீரகத்தூள் - ஒரு டீஸ்பூன்,
 மிளகுத்தூள் - அரை டீஸ்பூன்,
 நறுக்கிய இஞ்சி,
 கறிவேப்பிலை - சிறிதளவு.
 செய்முறை:
எல்லா பொருட் களையும் ஒன்று சேர்த்து வெது வெதுப்பான தண்ணீர் ஊற்றி பிசைந்து வைக்கவும். அரை மணி நேரம் கழித்து வாழை இலை (அ) பாலித்தீன் ஷீட்டில் எண்ணெய் தடவி கனமான அடைகளாகத் தட்டி தோசைக் கல்லில் சுட்டு எடுக்கவும்.

ராகி பிஸ்கெட்

  தேவையானவை:
ராகி மாவு - ஒன்றரை கப்,
 சர்க்கரைத்தூள் - முக்கால் கப்,
 டால்டா (அ) நெய் - அரை கப்,
 முந்திரி - 10,
 பேக்கிங் பவுடர் - ஒரு சிட்டிகை.
 செய்முறை: 
 ராகி மாவையும் பேக்கிங் பவுடரையும் மூன்று முறை சலிக்கவும். இதனுடன் டால்டா (அ) நெய், சர்க்கரை சேர்த்து கட்டிகள் இல்லாமல் பிசையவும். நறுக்கிய முந்திரியை போட்டு பிஸ்கெட்டுகளாக தட்டவும். கடாயில் மணலை பரப்பி, பத்து நிமிடங்கள் சூடு செய்து, பிறகு ஒரு அலுமினிய தட்டில் பிஸ்கெட்டுகளை வைத்து, 10 முதல் 15 நிமிடங்கள் வரை மிதமான தீயில் வைத்து மூடி 'பேக்' செய்யவும். 'மைக்ரோவேவ் அவன்'-ல் செய்பவர்கள் 1600 சென்டிகிரேட்டில் 20 நிமிடங்கள் 'பேக்' செய்யவும்.